Dame Carol Kidu i kamap nupela Oposisin lida

Dispela i nambawan taim insait long 6-pela mun long wanpela M-P i holim dispela wok.

Dame Carol i wanpela meri tasol long PNG Paliment we em igo pas long putim wanpela Equality bill blong ol meri long larem moa meri igo insait long paliment.

Dispela bill bai makim 22 sia olgeta blong ol meri insait long Paliment tasol ino bin kisim inap vout long tripela taim long Paliment.

Ol sia insait long sait blong oposisin i stap nating, stat long taim foma praim minista Sir Michael Somare i lusim wok taim Peter O'Neill i kisim long mun August las yar.

Sir Michael na ol sapota blongen i strong iet olsem ol tasol i trupela Gavman, bihainim sapot blong Lo na i holim ol namel sia long paliment olsem wanpela protes agensim Praim Minista O'Neill.