Sampela asailam sika blong Fiji i protest long Sydney ditensen senta

Sampela asailam sika blong Fiji i protest long Sydney ditensen senta

Sampela asailam sika blong Fiji i protest long Sydney ditensen senta

Postim 13 November 2012, 11:46 AEST

Ol lain husat i save halivim ol refugee na loia i tokaut long wari blong ol long tripela man blong Fiji husat i gohet long protest long antap ruf blong Villawood imigresen ditensen senta long Sydney.

Ol asailam sika ia i kalap long ruf blong dispela haus kalabus long aste.

Oli tokim ABC olsem oli poret long gavman bai salim ol i go bek long Fiji bihain oli salim go bek pinis wanpela kandriman blong ol long last wik.

George Newhouse, loia blong famili blong man Fiji 36-yar-old Josefa Rauluni, husat ibin jamp daun long ruf blong senta ia na ibin dai long 2010, ibin go visitim ol protesta ia long aste.

Em itok em i wari tumas olsem wankain samting we i bin mekim Josefa Rauluni i dai long 2010, i ken hapen tu long ol tripela man Fiji ia.

Ol otoriti ibin putim ol mattress raun long dispela bilding nogut ol asailam sika ia i jamp daun.

Tasol Mr Newhouse itok, long bipo, ol protesta i jamp abrisim ol mattress ia na i dai.

Long Mande, wanpela long ol trotesta ia, Sai Bulewa itok em ino laik go bek long Fiji long wanem oli save mekim nogut long ol gay pipol long hap.

Sain oli putim ap itok oli poret bai oli paitim ol, oli poretim sexual abuse na oli laik bihainim laik blong ol long stap olsem ol gay pipol, tasol oli nogat dispela kain rait long Fiji.

Long dispela moning, wanpela mausman blong Australia Department blong Immigration itok ol tribela man blong Fiji ia i stap yet antap long ruf blong Villawood ditensen senta.

Em ino tokaut long as blong protest blong ol, tasol em itok dipatment i gohet long lukluk long dispela isiu.