US, Japan na N Korea i welkamim ol lida blong China

US, Japan na N Korea i welkamim ol lida blong China

US, Japan na N Korea i welkamim ol lida blong China

Postim 16 November 2012, 10:01 AEDT

Amerika itok i hop China bai wokim moa long solvim ol heve long wol na Japan i laik poroman pasin wantaim China.

Ol i tokaut nau olsem Vice President Xi Jinpingblong China bai tekova long President Hu Jintao olsem general sekretari blong komunis pati.

Em bai tekova olsem President long stat blong yar ikam na Vice Premier nau ia Li Keqiang, bai kamap prime minister.

Bihain dispela toksave, United States itok em i hop ol niupela lida blong China bai wokim moa long solvim ol kainkain heve long wol.

Wanpela mausman blong Amerika itok rilesen wantaim China em i wanpela praioriti blong President Barack Obama long naba tu term blongen.

Em itok gutpela sindaun wantaim China em i impotant long ol isu olsem North Korea, Iran, climate change na ikonomi blong wol.

Kim Jong-Un, em lida blong North Korea, we i lukim China olsem nabawan poroman blongen i kongratuletim Xi Jinping.

China na Japan

Long wankain taim tu, Japan itok em i hop bai rilesen namel tupela kantri ia i kamap gutpela moa aninit long ol niupela lida blong China.

Tupela kantri ia i wok long koros pait long sampela liklik ailan long East China Sea.

Long dispela moning oli toksave olsem President Obama bai mit  wantaim ol lida blong China na Japan taim oli stap long dispela East Asia Summit bung long Cambodia neks wik.