Hamas lida na femili blong en idai long fait wantem Israel

Hamas lida na femili blong en idai long fait wantem Israel

Hamas lida na femili blong en idai long fait wantem Israel

Updated 19 November 2012, 9:30 AEDT

Hamas, wanpla strongpla politikal grup long Palestine itok, em bai bekim iet pasin em Israel ibin mekim long kilim dai wanpla Hamas lida na femili taem emi bin sutim wanpla roket bom na bagarapim haus blong ol long Gaza City.

Eitpla memba blong femili blong despla Hamas lida ibin dai bihaen long Israel ibin sutim wanpla roket bom na bagarapim tripla storey haus long Gaza siti long wiken.

Planti kantri long wold nau iwok long toktok strong long Hamas na Israel long stopim pastem ol fait em tupla saed wantem iwok long mekim egensim wanpla narapla insaet long despla faifpla dei igo pinis.

Despla roket bom ibin bagarapim tru despla haus blong Dalu family, na ol helt ofisa itok, fopla meri, na fopla pikinini ibin dai long en.

Tokman blong ol laen militari blong Israel itok, oli bin makim na sutim despla roket bom igo stret long haus blong  Yihia Abayah, husat i wok olsem wanpla sinia komanda blong Hamas long Gaza Strip.

Praim Minista blong Israel Benjamin Netanyahu ibin tokim ol lida blong ol narapla kantri olsem Israel iwok long traem hard tru long noken kilim ol sivilian pipal long despla fait emi wok long mekim egensim Hamas.

Tasol ol laen army blong Hamas itok olsem, bai oli bekim iet despla pasin em Israel ibin mekim long kilim Dalu famili.

Ol helt ofisa long Gaza itok samting olsem  69 pipal blong Palestine ibin dai na planti handrat ol narapla ibin kisim bagarap bihaen long Israel ibin bomim Gaza strip.

Planti long ol despla pipal husat ibin dai em ol meri na ol pikinini.

ABC/Reuters