PNG PM i laikim Australian investman, na aid ikam long China

PNG PM i laikim Australian investman, na aid ikam long China

PNG PM i laikim Australian investman, na aid ikam long China

Postim 29 November 2012, 9:41 AEST

Papua New Guinea  Praim Minista  Peter O'Neill, itok Australia na China imas lukluk long ol kaen wok em oli save bihaenim blong halvim igo long ol Pacific ailan kantri.

PNG istap olsem namba tu kantri husat isave kisim ol bikpla halvim tru ikam long Australia bihaen long Indonesia, na planti long ol despla halvim isave go long ol helt na good gavans progrem.

Mr O'Neil itok klostu olgeta moni em Australia isave givim igo long PNG emi save go long ol sevis olsem Helt na edukeisan, taem moni em China isave givim na em oli save baem liklik takis long en, isave go long ol transpot, shipping, na ol narapla samting olsem.

Emi bin tokim Newsline progrem blong  Australia Network olsem Australia na China  iken lukluk gut long ol halvim em tupla isave givim na kamapim wanpla gutpla wei long bringim ol despla halvim igo long PNG.

Australia isave givim samting olsem $500 million igo long PNG olgeta yia aninit long aid progrem blong en.

Mr O'Neill itok emi laik lukim despla Australian progrem igo long PNG long bihaenim laik blong gavman blong en long stretim ol infrastraksa em long despla taem iwok long go bagarap. Infrastraksa i karamapim ol samting olsem, ol rot, ol ples balus na ol shipping ports.

Mr O'Neill itok, planti Australian investman long PNG istap long ol wok mining, tasol emi laik lukim Australia long go insaet tu long ol narapla kaen wok olsem long agrikalsa na konstraksan.

Emi tok tu olsem emi laik lukim tu olsem planti moni long ol despla investman imas stap long Papua New Guinea.