Namba blong ol pipal i dai long Samoa inap go antap

Namba blong ol pipal i dai long Samoa inap go antap

Namba blong ol pipal i dai long Samoa inap go antap

Postim 15 December 2012, 16:04 AEDT

Polis long Samoa i kisim pinis bodi blong narapla man husat ibin dai bihaen long Saiklon Evan ibin hamarim kantri long despla wik.

Gavman ibin kamapim wanpla steit ov imagensi bihaen long Saiklon Evan ibin kamap na bagarapim kantri long Fonde.

Oli tok tupla pipal ibin dai long biktaon Apia.

Wanpla ples em oli kolim long  Magiagi klostu tasol long Apia ibin kisim bikpla bagarap tru.

Bikpla wara klostu long Apia ibin pulap na kapsaet nambaut na brukim ol haus na karim olgeta samting em oli stap klostu long despla wara.

Tede ol polis ibin bodi blong wanpla man aninit long ol pipia em ol tait wara ibin karim igo daon long despla wara.

Oli tok tu olsem oli wok long papainim iet wanpla man na liklik pikinini.

Oli tok nogut sampla pipal husat ibin stap long solwara taem despla saiklon ibin kamap, nogut ol tu i lusim laif blong ol.

Ol imagensi sevis ibin kisim na bringim ol pipal lusim ol haus blong ol igo long care senta bihaen long bikpla riva em oli kolim long Vaisigano ibin go antap na kapsaet na kamapim ol tait wara long Apia.

Tede oli bin kirapim sikispla care senta we oli wok long halvim ol pipal em saiklon ibin bagarapim ol haus blong ol.

Ol lokal pipal itok olsem despla saiklon emi wanpla strongpla na nogutpla saiklon stret em oli no bin lukim bifo.

Saiklon Evan ibin bagarapim ol gaden kaikai olsem banana, taro, tapioka, kapiak, wantem tu ol kokonas na kakao plantesin. Ol despla bagarap long ol gaden i min olsem ol pipal bai nogat kaikai long ol despla wik na mun ikam.

Travel advice

Australian dipatman blong Foran Afeas itok olsem, despla saiklon ibin kamapim ol bikpla bagarap long ol rot, ol telefon, ilektrisit na gas, na tu bikpla ples balus long   Faleolo International Airport".

Ofis blong Australian High Commission long Apia ipas nau inap oli opim ken sampla taem bihaen.

Nau oli wok long wari olsem Saiklon Evan bai hamarim tu Fiji.

Fiji  weather ofis itok despla taem nogut oa saiklon inap kamap olsem s category five cyclone - em bai kamapim ol strongpla win em mak blong ol bai nap kamap long  360 kilometres long wan wan hour - na sopos emi bihaenim iet rot blong en, em bai kamap long Fiji tumora.

 

ABC/AFP