Fiji PM i kamapim steit ov disasta

Fiji PM i kamapim steit ov disasta

Fiji PM i kamapim steit ov disasta

Updated 19 December 2012, 9:37 AEDT

Intarim Praim Minista blong Fiji i kamapim pinis wanpla steit ov disasta long kantri blong en bihaen long emi bin go lukim ol bikpla bagarap em Saiklon Evan ibin kamapim.

Saiklon Evan i stap olsem bikpla taem nogut emi bin hamarim Fiji long 20pla yia, wantem ol strongpla win em strong blong ol ibin stap olsem 270 kilometre long wanpla wanpla aua. Ol despla win na ren ibin kamapim ol tait wara oa floods.

Despla steit ov disasta bai stap inap long 15pla dei na bai larim ol otoriti long mekim kuik ol wok blong stretim ken ol samting na ples.

Planti tausan pipal ino bin gat ilektrisiti na ol otoriti bai wok hard blong rbingim bek despla sevis kuik taem.

Nau oli wok long bringim bek wara isi isi, na oli opim pinis bikpla international ples balus long Nadi na ol balus istat long iusim ken despla ples balus.

Saiklon Evan ibin kamapim ol tait wara na bagarapim planti haus blong ol pipal, na tu ol biris na rot ibin bagarap.

Gavman iwok long givim woning iet igo long ol pipal olsem, oli mas go long ol care senta, long wonem wara iwok long karamapim iet planti ol biris na rot, na ol wara tu iwok long go antap iet.

Moa long 8000 pipal istap nau long ol care senta long olgeta hap blong kantri.

Tasol Fiji gavman itok, oli no kisim iet ol toktok sopos sampla pipal ibin dai, olsem long Samoa we fopla pipal ibin dai na tenpla iwok long lus bihaen long Saiklon Evan ibin hamarim despla kantri long wik igo pinis.

Neville Koop meteorology na climate advaisa bilong Secretariat blong Pacific Regional Environment Programme long Suva itok olsem planti pipal long ol care senta bai stap iet long ol despla senta long ol despla dei ikam.

 

 

Ol Het-tok: