UN i pinisim wok long East Timor

UN i pinisim wok long East Timor

UN i pinisim wok long East Timor

Postim 31 December 2012, 9:01 AEDT

Laen blong United Nations i pinisim tru olgeta peace keeping wok blong en long  East Timor tede.

United Nations wantem halvim ikam long Australia na New Zealand, ibin mekim ol wok lukaut long East Timor inap long sevenpla yia nau.

East Timor istap olsem wanpla yangpla kantri tru long Asia.

Ameerah Haq, UN under-secretary general na bosman bifo blong United Nations long East Timor, itok olsem wanpla laen husat bai kliarim na pinisim gut ol wok  oa 'liquidation team' bai kisim ol wok em ol  peacekeeping soljia isave bin mekim bifo.

United Nations ibin mekim bikpla wok tru blong halvim East Timor i kamap olsem wanpla indipendant kantri.

Emi bin redi-im ol wok long kamapim wanpla vout oa referendum long 1999 emi bin pinisim tu ol wok lukaut blong Indonesia. Gavman blong Indonesia ibin lukautim East Timor long 24 yia, we planti pipal husat ibin wok long fait egensim Indonesia ibin dai long han blong ol militari blong Indonesia.

Bihaen long despla 1999 referendum, United Nations ibin lukautim East Timor inap long yia 2002 taem East Timor ibin kisim indipendans.

Tasol long yia 2006, gavman blong East Timor ibin askim United Nations long helpim em ken, bihaen long sampla soljia husat ibin lusim ol wok blong ol ibin kamapim ol bikpla trabal we planti pipal ibin dai na samting olsem 150 tausan pipal ibin ronowei na stap long ol care senta.

Ol narapla kantri nau iwok long soim bikpla laik long statim ol bisnis blong ol long East Timor, long ol kaen wok olsem Gas na oil.

Sekreteri blong State blong America, Hillary Clinton ibin mekim lukluk raon igo long Dili long mun September, China ibin bildim bikpla haus oa palas blong President na hedkuata blong difens fos. Brazil tu isave givim ol halvim igo long East Timor na Cuba i halvim planti yangpla East Timor pipal long dokta treining.