PNG polis i wari long praivet sekiuriti plan

PNG polis i wari long praivet sekiuriti plan

PNG polis i wari long praivet sekiuriti plan

Postim 4 January 2013, 12:05 AEDT

Polis long PNG i wari long wanpela plan blong putim ol sekiuriti kamera long Port Moresby na makim praivet sampela wok blong polis.

Ol nius media i save tok Port Moresby siti i olsem wanpela long ol denjaras siti long wol na ol otoriti i laik putim ol sekiuriti kamera raun long siti blong katim daun ol kriminol pasin.

Wanpela long ol husat i bihainim dispela plan, Gavana blong National Capital District Powes Parkop, itok oli nid long wokim sampela samting long stopim kain tingting olsem ol pipol i save kosim trabol na bai oli go fri.

Em itok ol kriminol imas save olsem ol bai nonap gohet wantaim kain pasin blong stilim ol bilum oa car na bai oli nonap arestim ol na kotim ol.

Mr Parkop itok long nau ia, i luk olsem ol kriminol lain i ting oli save bihainim laik blong ol yet - na dispela imas stop.

Ol kamera ia bai salim ol piksa igo long wanpela lokol hedquata blong dispela intanasenal sekiuriti kampani, G4S.

Kampani ia itok bai em i toksave long polis sapos oli lukim sampela kiriminol pasin i gohet - na bai oli save yusim ol piksa ia long kot.

Tasol plan blong Gavana Parkop i go moa - em i laik long G4S sekiuriti gad long dil wantaim sampela liklik trabol we ol polis i nonap dil wantaim.

Em itok oli gat 1,000 polis man na meri long siti we igat samting olsem 700,000 pipol na long sampela yar ikam bai dispela i go antap long 1 milion.

General Manager blong Communications na Technology long G4S, Rob Andrews, itok ol gad blongen bai dil tasol wantaim ol liklik samting olsen kaikaim buai long rong peles oa stopim pipol i koros pait nogut em i kamap bikpela bihain.

Mr Andrews itok igat risk long ol gad blongen i ken ova riakt na wokim samting we em ol polis tasol i gat paua longen.

Tasol Metropolitan Superintendent Peter Guinness itok nogat wanpela i toktok wantaim ol polis long dispela plan blong setim ap ol sekiuriti kamera na yusim ol sekiuriti gad long wokim wok blong polis.

Em itok em na police bai no toktok oa wokbung wantaim G4S.

Superintendent Guinness itok ol kamera bai brukim sait long privacy aninit long mama loa blong kantri, na ol bai nonap yusim video recording long kot.

Em itok ol polis tasol igat paua long enfosim loa na ino ol gad.

Em itok sapos G4S em i laik tekova long wok blong polis, em i minim oli brukim loa, longwanem oli statim narapela polis fos long kantri.

Superintendent Guinness itok em i tru ol polis i nogat risosis long mekim gut wok blong ol.

Tasol em itok bai oli nap wokim gut moa wok blong ol sapos oli givim long polis dispela moni we oli plan long bain kamera na ol sekiuriti gad longen.