PNG polis bos i sem long pasin blong ol ofisa

PNG polis bos i sem long pasin blong ol ofisa

PNG polis bos i sem long pasin blong ol ofisa

Postim 29 January 2013, 9:05 AEDT

Papua New Guinea polis bos i sem long ol ofisa blong en isave  paitim nogut ol pipal.

Ol polis long papua New Guinea igat nem nogut long ol pasin korapsan na iusim strong blong ol paitim nating nating ol pipal oa bagarapim ol propati blong ol narapla.

Tasol, Polis Komisina Tom Kulunga ibin askim ol lida blong polis long holim kuik wanpla miting blong toktok long ol despla heve bihaen long wanpla polis man ibin iusim ain blong wanpla tyre blong kar long brukim leg blong meri blong en. Oli bin putim despla stori long midia long PNG.

Polis Komisina Kulunga ibin tok olsem emi sem nogut tru long ol despla kaen pasin em ol ofisa blong en isave mekim na emi odarim ol komanda blong en long stretim na daonim despla kaen pasin.

Emi askim intanal afeas ofis long lukluk igo insaet long ol despla midia ripot.

Komisina Kulunga i odarim tu ol polis long rausim olgeta polis kar em oli nogat polis mak long ol long noken ron nabaut long Port Moresby, oli mas pinisim ol risev polis long wok blong ol na tu bai oli mas statim ken ol polis perade long wanwan wik.