PNG Unitech Vice Chancellor heve

PNG Unitech Vice Chancellor heve

PNG Unitech Vice Chancellor heve

Updated 19 February 2013, 11:53 AEST

Papua New Guinea University blong Technology Vice Chancellor, Dr Albert Schram, itok oli no bin larim em go insait long PNG taim em laik go long opim blong skul yar blong university.

Dr Schram ibin tokim Pacific Beat program blong Radio Australia olsem oli no toksave longen long as blong oli stopim em long go bek insait long PNG.

Ol Imigraesen ofisel i holim dispela man blong The Netherlands taim em i go bek long Port Moresby eli blong dispela mun na i putim em long wanpela balus ikam long Australia.

Dr Schram itok em ino klia long risin oli wokim olsem, maski igat tokwin olsem oli rausim permit long em i save wok long PNG.

Em itok oli no bin rausim em aninit long wanpela lo blong PNG so em ino stret long oli wokim olsem longen.

Long dispela nau em itok em i askim embassy blong Kingdom blong The Netherlands long Canberra long bihainim as blong dispela pasin oli wokim longen.

University blong Technology long Lae ibin askim kwestin long ol pepa blong Dr Schram long sait long skul na wok blongen.

PNG Minista blong Higher Education, David Arore, ibin tokim ol media long PNG em i tru oli putim Dr Schram long wanpela balus igo long Brisbane , tasol em ino toksave long as blong wai oli wokim olsem.

Em itok dispela em ino "deportation", tasol ol ino larim Dr Schram long go insait long PNG inap long oli pinisim investigesen blong ol.