Sea Shepherd mekim Japan stop hantim wel

Sea Shepherd mekim Japan stop hantim wel

Sea Shepherd mekim Japan stop hantim wel

Updated 21 February 2013, 12:43 AEST

Japan i stop hantim ol wel (whale) long Southern Ocean long sampela taim bihain long oli clash wantaim Sea Sheperd anti-whaling activist.

Sea Shepherd itok ol nau i win bihain long Japan itok oli lusim wel hanting long sampela taim insait long Southern Ocean long tablo long Australia.

Long Trinde, dispela anti-whaling grup itok wanpela ship blong Japan i bampim tupela long ol bot blong ol, Steve Irwin na Bob Barker, insait long Antarctic solwara blong Australia.

Em itok dispela atak i kamap bihain long wanpela long ol whaling ship blong Japan i tokim ol long raus long dispela hap.

Ol activist ia i tokwin olsem ol coastguard blong Japan i toromwe "concussion grenades" long ol bot blong ol.

Fisheries agency blong Japan itok dispela ino tru, tasol oli tok em i tru wanpela faktori ship blong ol, Nisshin Maru, i bampim tupela bot blong Sea Shepherd.

Oli tok oli bampim tupela bot ia bihain ol activist ia i go klostu tumas long wanpela ship blong Japan we i gohet long rifilim fiul.

Institute of Cetacean Research blong Japan itok em i stopim wok nau ia long wanem oli nonap rifilim fiul blong ol ship blong ol.

Bob Barker captain Peter Hammarstedt inbin tokim ABC olsem em i wanpela denjaras samting tumas ibin kamap namel long tupela grup ia.

Em itok dispela ship Nisshin Maru i bampim bot blong em ba em i poret olsem oli klustu tru long kapsait na go daun long solwara.

Het blong Sea Shepherd na kapten blong Steve Irwin, Paul Watson itok dispela atak i sain blong Japan i painim had tru long wanem oli lusim planti milion dola.

Em itok wol i agensim ol lain blong Japan ia...na nogat wanpela i bilip olsem hantim wel oli mekim ia em blong sait long science - trupela samting olsem oli wokim dispela blong mekim bisnis tasol. Em itok oli nau painim had tru na i wok long koros.

Mr Watson itok i luk olsem em i had long ol Japanes whalers ia bai statim gen long hantim ol wel long dispela yar.

Em itok igat 18-pela de tasol i stap long taim blong hantim wel long dispela yar.

Sea Shepherd director and former Greens leader Bob Brown itok dispela clash i worst wan long Southern Ocean insait long tripela yar.

Em itok em i wanpela denjaras samting tru na em soim Japan gavman i brukim ol international sea law, international environmental law na international territorial law.

Em itok Tokyo i nau kontrolim solwara blong Australia na gavman blong Australia i mas salim ol ship blong pait long go lukautim solwara blong kantri.

Opposition environment mausman Greg Hunt i wanbel long dispela na itok Federal Government ino laik luksave long dispela heve.

Em itok em ibin rait long Environment Minister na askim long salim go wanpela Customs bot go long dispela eria hariap.

Mr Hunt itok sapos gavman ino mekim olsem, em i minim oli no luksave long dispela pait na heve we bai minim Japan blong gohet long kilim dai ol wel na tu i putim laip blong ol pipol long denja.

Tasol Environment Minister Tony Burke itok gavman em i nid long wari.

Em itokim ABC News olsem pipol i nid long lukaut na meksua oli no bagarapim wok blong conservation insait long Antarctic.

Em itok gavman em bai dil wantaim dispela long kot na ino long pait pasin - na em i laik lukim tupela sait wantaim long dispela pait i mas stap isi.

Mr Burke itok gavman i laik lukim safety long solwara - tasol ol ripot i soim narapela kain.

Defence Minister Stephen Smith ibin tokim ABC News Breakfast olsem gavman i nogat plan long salim Navy igo long Southern Ocean.

Australia Maritime Safety Authority itok oli gohet long investigetim dispela pait namel long tupela lain ia.