Australia hamamas long Manus senta

Australia hamamas long Manus senta

Australia hamamas long Manus senta

Updated 26 February 2013, 18:19 AEDT

Gavman blong Australia ino lukim wanpela samting i rong long asylum seeker senta blong ol long Manus ailan

Immigration Minister bilong Australia, Brendan O'Connor itok em i hamamas long dispela Asylum Seeker Processing senta long Manus ailan.

Minister O'Connor ibin go lukluk long dispela processing senta aste, long wanpela raun bilong em igo long Papua New Guinea.

Em i tokim ol niusman long Port Moresby olsem emi toktok wantaim moa long 20-pela ol manmeri long displa kemp, na emi hamamas long stap blo ol dispela asylum seeker na ol pikinini na femili bilong ol.

Mr O'Connor ibin bungim tu wanwok blo em - PNG Foreign Affairs na Immigration Minister Rimbink Pato, na strongim ol toktok blong kamapim wanpela pemanent processing senta long Manus ailan.

Tasol Minista O'Connor ino tokaut wanem taim steret bai Australia i steretim pepa bilong ol nambawan lain asylum seeker long kamap olsem ol refugee.

Raun bilong Minister O'Connor igo long PNG i kam namel long wanpela taim we, planti ol manmeri bilong Australia na PNG igat kainkain tingting long dispela asylum seeker toktok.

Long mun January bikpla opis bilong ol refugee long wold UNHCR ibin mekim wanpela ripot olsem stap bilong ol dispela asylum seeker long Manus, em ino gutpela tumas, na Australia na PNG imas hariap long steretim.

Tasol Minister O'Connor ibin tokim ol newsman long Port Moresby tete avinun olsem, inogat rong long stap bilong ol asylum long Manus, na em i hamamas long stap bilong ol.

Memba bilong Manus electorate Ronny Knight i tok olsem, Manus i nogat heve wantaim sindaun bilong ol asylum seeker long island blo ol.

Tasol em i sapotim toktok bilong Gavana bilong Mista Charlie Benjami, olsem Gavaman bilong Australia na PNG imas bihainim toktok bilong ol na givim halivim long Manus olsem ol ibin promis.

Mista Knight itok tu olsem, Manus Provincial Gavaman ibin halivim Gavaman bilong Australia na PNG long painim ol hap giraun bilong sanapim wanpela pemanent processing center bilong ol asylum seeker insait long region.

Tasol Mista Knight itok, em i laikim wok bung long kamap namel long tupela gavaman na ol pipol bilong Manus.