BBC nau i fesim niupela trabal bihaen long tupela ripota blongen i bin tok oli titsa long London School ov Economics (LSE) blong wokim dokumentri long North Korea.
Nau LSE i laikim long oli klosim daon despela Panorama program bikos em i tok despela operesen i bin nap kamapim heve igo long ol sumatin em i bin wokobaut wantaem tupela ripota long despela mission.
North Korea i wok long mekim ol strongpela toktok long bomim United States oa Amrerica, South Korea na Japan stat long taim UN i bin putim ol tambu long ol wok wantaem North Korea long mekimsave longem long em i bin testim ol nuklia samting blong pait blongen long mun Februari.
Na em i gat ol tokwin long bai North Korea i sut long wanpela niupela roket bom long despela wik.
BBC niusmant, John Sweeney i bin go wantaem meri blongem na wanpela kamaraman wantaem despela laen sumatin blong LSE na oli haitim toktok long oli wok long BBC olsem ripota blong traim na painim hau pipal i sindaon insaet long North Korea
Em i bin tok em tru oli no bin tokim ol sumatin olsem em i gat tripela pipal i go wantaem ol na oli haitim wanem kain wok oli bai mekim.
Nogat wanpela samting i bin go rong, na oli no painim aut, ewm olsem stret film Argo.
Sweney i tok sampela long ol sumatin i wok long kisim ol pas pas i kam long North Korea em ii gat bikpela toktok kros longen stat long taim blong despela wokobaut blong ol.
Em i tokim BBC Radio 4 olsem ol sumatin i bin brav na gutpela.
Em i tok, bikpela lan long ol sumatin i bin sapotim dispela progrem, oli no bin mekim wanpela samting.
LSE namba-tu Dairkta, Professor George Gaskell i tok BBC i bin nap givim bikpela heve tru long ol sumatin na tu olsem despela missioni givim heve long independens blong ol universiti titsa.
Em i tok oli wari tru long kain oli mekim long oli no tingim sefti na sekiriti blong ol sumatin.
BBC i no laik stopim despela Panorama program, em bai oli brotkast longen long moning long Tunde.
Long website blongen, BBC i tok Sweeney i bin lusim eitpela de long haitim wanem wok em i wokim oa undercover "long despela kantri we oli save wuas gut lna kontrolim pipal long olgeta taim.
Sweeney i bin travel i kam long capital Pyongyang na go long countryside na go moa stret igo long de-militarised zone long boda wantaem South Korea, Em i bin lukim ples i narakain olgeta long ples long dispela graon.
Ol sumatin i bruk long despela isu tasol Alex Peters-DAY blong LSE Students Union i holim bilif olsem oli bin usim ol memba blongem olsem human shield
Em i tok BBC i bin laki nogat bikpela srong i bin kamap tasol em i tok sapos i bin gat birua na kain olsem bai olsem wanem nau ia.
BBC head blong news programs Ceri Thomas i bin mekim toktok blong sapotim despela program.
