PNG gavman imas givim moni em i promisim long UPNG

PNG gavman imas givim moni em i promisim long UPNG

PNG gavman imas givim moni em i promisim long UPNG

Updated 14 December 2016, 15:12 AEDT

Loia blong ol sumatin long University blong Papua New Guinea i sapotim askim blong UPNG Chalcellor, Dr Nicholas Mann long gavman imas givim moni em i bin promisim long mekim ol sumatin i pinisim protest blong ol na go bek long skul.

Dr Mann i tok Praim Minista Peter O'Neill ibin promisim 12 million Kina long mekim university i gohet wantaim dispela academic yia, bihain ol protest long sampela mun.
 
Ol dispela protest em blong askim Praim MInista O'Neill long aut pastaim long wok blongen taim ol polis i investigetim em long ol tokwin long korapsan.
 
Dr Mann i tok sapos gavman ino givim dispela moni, bai ol i pasim skul na bai sampela trabol i ken kamap gen.
 
Loia blong ol sumatin, Laken Lepatu Aigilo i tok ol sumatin ibin bungim planti heve pinis long ol wok long bringim respek na digniti long wok blong praim minista blong kantri.
 
Em i tok maski Mr O'Neill i stap yet olsem praim minista, ol sumatin ibin win long wanem ol narapela praim minista long bihain taim bai tingting gut long gutpela nem blong dispela impotant ofis.
 
Mr Aigilo i tok gavman imas givim dispela moni na larim ol sumatin i pinisim gut 2016 skul blong ol.