Australia Polis i arestim West Papua Ektivis

Australia Polis i arestim West Papua Ektivis

Australia Polis i arestim West Papua Ektivis

Updated 11 January 2017, 15:16 AEDT

Australia Polis i arestim wanpla West Papua Ektivis bihaenim wanpla peaceful mas long Indonesia Gavman ofis long Melbourne.

Tede long moning sampla West Papua pipal, na ol sapota blong ol ibin go na mekim wanpla peaceful protes arasaet long Consulate oa gavman ofis blong Indonesia long Melbourne.

Polis ibin pulim kalabusim wanpla long ol despla protestas.

Oli tok oli bin mekim despla protes blong soim sapot blong ol long ol tingting na wok em Australian militari igat long ol treining blong ol we itok West Papua ino hap blong Indonesia.

Despla ol toktok ibinmekim lida blong militari long Indonesia long stopim ol wokbung namel long ol militari blong Indonesia na Australia long wik igo pinis, long wonem Indonesia itok, des;pla kaen toktok ino stret long wonem West Papua emi hap blong Indonesia.

Indonesia ibin kisim nating West Papua aninit long wanpla vout em oli bin kolim vote of free choice moa long faifpla ten yia igo pinis, tasol ol West Papua pipal ino laikim Indonesia long lukautim ol, olsem na ikam inap nau oli wok long fait long bruk lusim Indonesia.

Ol ripot itok olsem moa long faif handrat tausan pipal i dai pinis aninit long han blong ol militari na polis blong Indonesia.

Jacob Rumbiak, wanpla West Papua lida long Australia itok, protes blong ol ibin bihaenim tu wanpla toktok emi bin kamap long wanpla niuspepa long Indonesia we oli bin askim gavman blong Australia long stopim ol West Papua pipal long Melbourne long mekim ol protes agensim Indonesia.