OFC U-17: NZ givim Samoa 11-0 Solomon an Fiji 1-1

OFC U-17: NZ givim Samoa 11-0 Solomon an Fiji 1-1

OFC U-17: NZ givim Samoa 11-0 Solomon an Fiji 1-1

Postim 14 February 2017, 16:11 AEDT
Long ol match long Second Round blong 2017 Oceania Football Confederation Under-17 Championship long Tahiti aste, New Zealand ibin bagarapim Samoa na Solomon Islands na Fiji tupela ibin dro.
 
Olketa yanfala All Whites blong New Zealand ia i mekim gudfala stat long defens blong OFC U-17 Championship title blong olketa taem olketa i barava spoelem Samoa long 11-0.
 
An long narafala Group B match Fiji an Solomon Islands tupela i putim ap strongfala fait an dro 1-1 long plei blong tufala.
 
Nius from OFC website hemi se olketa New Zealand i tekem 5 minit nomoa for skoarem fest goal blong olketa and long haf taem, olketa i skoarem finis 5 fala goal.
 
Olketa Samoa i faet had long stat blong sekon haf bat olketa yang Kiwi i stat for skoa moa afta 12 minutes - an long full taem, skoa hem 11-0.
 
Coach Desmond Faaiuaso blong Samoa hem se nomata olketa lus olsem long New Zealand, hem hapi wetem performance blong olketa boe blong hem.
 
Hem se kompea wetem hao olketa ibin plei agensim New Zealand long bifoa, olketa i mekem samfala impruvmen and hop fo plei beta agensim olketa narafala tim
 
Long gem melwan Solomon Islands and Fiji, Fiji hem skoarem goal blong hem afta onli 3 minute - wea hem givim konfidens long olketa and mekem Solomon Islands fo mas faet had moa.
 
OFC nius ripot ia hem se, plei hem barava kwik wetem quick-pass style blong Solomon Islands - an Fiji i moa physical and iusim gut olketa tol pleia blong olketa fo kontrolem bol.
 
Long break, skoa hem stap long Fiji 1 - Solomon Islands nil.
 
Solomon hem plei strong moa long stat blong sekon haf and olketa pres hard gogo afta 6 minit, Elis Mana hem faerem bol insaet long net from wanfala cross from Steward Toata.
 
Wetem disfala 1-1 skoa, tufala saet i apum moa plei blong tufala for trae fo getem trifala point bat gogo hem end ap long dro.
 
Fiji coach Shalen Lal hem ting se high intensity plei blong Solomon Islands hem mekem hard for tim blong hem.
 
Solomon coach Marlon Houkarawa hem se tufala saet evriwan i plei hard - fiji hem strong tumas long fest haf bat olketa boes blong hem i faet hard moa long seong haf.
 
Long Group A plei tumoa bae Papua New Guinea hem fesim Vanuatu, and Tahiti bae pleim New Caledonia.
 
Long Group B,  Zealand bae fesim Solomon Islands and Fiji bae pleim Samoa long Thursday taem blong iumi, wea hem Wednesday taem blong Tahiti.