Australian aid igo long PNG em ino charity

Australian aid igo long PNG em ino charity

Australian aid igo long PNG em ino charity

Postim 30 March 2017, 14:41 AEDT

Lida blong oposisan long Papua New Guinea, itok emi sapotim ol toktok blong Australian Minister blong International Development, Senator Concetta Fierravanti-Wells olsem Aid progrem blong Australia ino wanpla charity.

Mr Don Polye i mekim despla toktok tede bihaen long Minista Concetta Fierravanti-Wells ibin bekim askim blong PNG gavman long ol halvim oa aid em Australia isave givim imas go stret na sapotim  budget, wankaen oli save bin mekim long ol yia 1990's.
 
PNG gavman ibin mekim despla askim long Australia-PNG Ministerial miting em oli bin holim long Madang long stat blong despla mun.
 
Aste Senator Concetta Fierravanti-Wells ibin autim despla toktok blong en long Pacific Beat progrem blong Radio Australia.
 
PNG Oposisan lida Don Polye itok em na laen blong en i wanbel wantem ol tingting na wok em Australia i wok long bihaenim nau long ol halvim emi save givim long PNG.
 
Mr Polye itok tu olsem PNG ino gat gutpla rekod long lukautim moni blong kantri, olsem na Australia ino ken bihaenim despla askim blong gavman.