Planti long rural PNG i no kisim ileksan nius

Planti long rural PNG i no kisim ileksan nius

Planti long rural PNG i no kisim ileksan nius

Postim 19 June 2017, 16:29 AEST

Sampela pipal long rural eria blong Papua New Guinea i askim strong wonem laen igo long palaman bihaen long ileksan long bringim ol wok nius igo long ol long wonem oli stap nau long tudak.

Askim blong ol i kamap long despla wik, taem kantri i redi long statim ileksan long namba 24 June na oli tok ol information oa media sevis em oli gat nau isave helpim tasol ol pipal long ol taon.
 
Oli tok, ol i save ridim ol niuspepa, tasol ol despla niuspepa isave kamap long ol wanpla oa tupla dei bihaen long oli raitim, na tu ol redio stesin isave brodkas tasol long FM sevis we ino save go long ol bush ples.
 
Sampla pipal long ol longwei ples itok oli hangre stret long kisim nius ikam long provins blong ol, ol nius ikam long kantri iet, ol nius ikam long Pacific rijan na tu long wold, long wonem ol redio sevis ino save go long ol rural eria.
 
Wanpla long ol despla pipal em Mathew Lawun husat isave bin wanpla strongpla listerner blong Radio Australia bifo na emi kam long Sumkar distrik long Madang provins.
 
Mr Lawun itok ol palaman memba imas tingting long bringim despla bikpla sevis igo long ol rural pipal, long wonem ol tu em ol pipal blong PNG.
 
Narapla man husat ibin wanpla strongpla listener blong RA long taem shortwave sevis ibin stap iet, em Mathew Olape blong Magarima distrik long Hela provins na emi tok long despla taem blong ileksan bai oli stap long tudak long wonem oli no gat wei long harim redio long kisim ol bikpla toktok long ileksan.