Australia i givim moni long Solomon Islands afta RAMSI

Australia i givim moni long Solomon Islands afta RAMSI

Australia i givim moni long Solomon Islands afta RAMSI

Updated 30 June 2017, 15:08 AEST

Waka blong Regional Assistance Mission long Solomon Islands hem finis nao long tude afta 14 fala yia, bat Australia wea hem bin lidim RAMSI bae hem gohet fo helpem Solomon Islands long plande eria.

Long yestede Austalian Minister for International Development and the Pacific, Senator Concetta Fierravanti-Wells hem talem aot wanfala 142 million Australian dollar aid assistance fo Solomon Islands fo trifala yia.

Hem se diswan hem long saet long enikaen development olsem tu disfala Tina River Hydro power development project long Guadalcanal, and saet long sekiuriti.

Senator Fierravanti-Wells an Danny Philip, Solomon Islands Minister for Development Planning and Aid Coordination nao tufala saenim disfala aid agriment.

Hem se tu olsem agriment ia hem folom olketa plan blong Solomon Islands gavman long saet long divelopment long kantri, an prioriti blong Australia long foren aid.

Minista Danny Philip hem se disfala aid hem go long medium term development plan blong gavman wea plende long hem hem long rural eria.

Senator Fierravanti-Wells hem se tu olsem bigfala half blong disfala aid hem bae long saet long sekiuriti wea bae lukim samfala Australian Federal Police ofisa i gohet for waka wetem Solomon Islands Polis.

An hem gohet fo talem tu olsem tufala gavman blong Solomon Islands and Australia i gohet fo stretem wanfafa treaty agriment wea bae Australia hem save go kuik taem fo helpem Solomon Islands sapos hem nidim help moa long saet long sekiuriti.

Australian Senator ia hem se tu olsem RAMSI hem wanfala sakses long Solomon Islands an olketa Forum lida i laek fo wanfala organisesin olsem fo hem stap fo helpem eni kantri long rijin we hem nidim help olsem long Solomon Islands.