PNG Hunters win i mekim kantri i bungwantem

PNG Hunters win i mekim kantri i bungwantem

PNG Hunters win i mekim kantri i bungwantem

Updated 26 September 2017, 9:58 AEST

Igat bikpela hamamas long ol rugby league fan long Papua New Guinea na hia long Australia, bihain long historik win blong ol PNG Hunters long grand final blong Queensland Intrust Super Cup Sande.

Ol Hunters ibin fait hard tru long 12 - 10 win blong ol agensim ol Sunshine Coast Falcons long Brisbane.

Coach Michael Marum i tokim Radio Australia long Mande olsem, ol Hunters i tok tenkyu long sapot blong ol pipol blong Papua New Guinea we i wok long singaut na enkarejim ol boys long stadium igo inap long last whistle.

Em i tok win blong ol Hunters em i win blong olgeta pipol blong Papua New Guinea.

Marum i tok tu olsem 2018 season bai tard moa, tasol em i tok ol PNG Hunters bai strong long difendim taetol.

Long tingting long go insait long NRL, Michael Marum i tok ol Hunters i hed go long rait direction na sapos oli gohet long pilai gut - bai oli kisim luksave na i nap go insait long NRL long sampela yar i bihain.

Ol dispela niupla champion PNG Hunters ibin kisim bikpela welkam blong ol hero taim oli kamap long Jacksons Airport long Port Morersby aste apinun.

Planti long ol excited fan ibin go welkamim ol long airport na planti moa long olgeta hap long Papua New Guinea i hamamas tru long win blong ol Hunters.

QRL rugby league ripota long Port Moresby, Melvin Levongo i tok ol Hunters i fait hard na i win maski 9 pela pleia blong Melbourne Storms long NRL ibin helpim ol Sunshine Coast Falcons.