PNG Gavman i salim ol Oil Search sheas

PNG Gavman i salim ol Oil Search sheas

PNG Gavman i salim ol Oil Search sheas

Postim 28 September 2017, 11:55 AEST

Prime Minister blong Papua New Guinea, Peter O'Neill ibin tokim palaman long despla wik olsem gavman blong en i salim pinis ol share blong en long Australian-oil na gas kampani, Oil Search.

Tingting blong gavman long baem ol despla shares long 2014 ibin kirapim  planti kros tru long kantri long wonem gavman ibin kisim bikpla dinau tru ikam long UBS bank blong Switzerland long baem ol despla shares.

Gavman tu iwok long lusim planti moni long baem bek despla dinau.

Ol shares em gavman i salim istap olsem 30 million long wanpla wok em oli kisim samting olsem $200 million long en, tasol taem gavman ibin baem oli bin tok olsem mak blong moni em oli bin baem ol share long en ibin stap olsem of 254 million US dollars.

Ol ripot itok olsem planti win moni em gavman isave kisim taem oli save salim  PNG LNG oli save iusim blong baem bek despla dinau, na despla isave stopim gavman long stretim na kamapim ol sevis olsem helt, edukeisan na ol narapla samting tu olsem.

Nau Praim Minista O'Neill itok pasin em gavman i mekim long salim ol despla shea emi gutpla.

Mr O'Neill itok tu olsem ibin tokaut tu olsem oil search emi gutpla kampani we emi save helpim kantri.

Planti toktok iwok long go hed nau long PNG long as tingting blong Mr O'Neill long salim ol despla shea, sampla i wanbel olsem dinau nau i pinis.

Gavana blong Oro provins itok emi no klia gut as tingting blong Praim Minista long salim ol despla shea.