Goroka Banana Block victim i silip long sel haus

Goroka Banana Block victim i silip long sel haus

Goroka Banana Block victim i silip long sel haus

Updated 29 September 2017, 15:25 AEST

Planti long pipol we ol i sutim tok long ol polis ibin kukim haus blong ol long Banana Block long Goroka, biktaun blong Eastern Highlands Province oli nau silip tasol long ol tenr oa sel haus.

Namel long ol em i haus blong papa-mama blong Bongre Anton Peter, liklik 3-year old pikinini boi we ibin kamap long nius long PNG na long world olsem em i gat kansa long rait eye blongen - na ibin gat apil long tritim.
 
Tasol pikini ibin dai pinis long Friday last wik, na long Mande morning, papa blongen Peter Anton i tok oli stap long haus krai taim ol polis i go na paitim ol na kukim haus blong ol.
 
Mr Anton i tokim Radio Australia olsem paia i kukim tu 3,000 kina blong planim pikinini blongen, na nau em na meri blongen i lusim olgeta samting na ino save hau bai oli planim pikinini.
 
Bodi blong Bongre Anton Peter i stap yet long funeral home nau ia.
 
Pastaim long dispela wik, Eastern Highlands Provincial Police Commander Alex N'Drasal i tok em bai kisim ripot pastaim na em bai toktok long mipela.
 
Tasol i kam inap long tede, Radio Australia ibin wok long ring Mr N'Drasal,  tasol mipela ino toktok yet longen yet.
 
Long Trinde long wik tu mipela i askim Police Commissioner, Gary Baki tasol em i tok em ino harim dispela trabol long taim ia.