PNG imas oraetim Arms Trade Treaty

PNG imas oraetim Arms Trade Treaty

PNG imas oraetim Arms Trade Treaty

Updated 3 October 2017, 13:42 AEDT

Wanpla lida meri blong Papua New Guinea i askim strong gavman long oraetim oa ratifaim despla loa em oli kolim Arms Trade Treaty (ATT) blong helpim kantri iwok bung wantem ol narapla kantri long stopim ol pasin blong baem na salim ol samting blong fait long wold.

Mrs Helen Hakena i mekim despla askim bihaen long emi bin stap insaet long namba tri Conference of  Parties long Arms trade treaty em oli bin holim long  Geneva long Swizerland long mun igo pinis.

As tingting blong despla kaen wok em blong lukim olsem olgeta kantri em oli stap insaet long despla treaty i i wokbung blong kamapim peace, security na daonim pasin blong kilim nating ol narapla wantem ol despla samting blong fait olsem gun.

Long Pacific rijan, Papua New Guinea ino sainim iet despla treaty, tasol ol liklik kantri olsem Samoa, Palau na Tuvalu i sainim pinis despla treaty.

Mrs Hakena husat igo pas long Leitana Nehan Development agensi long Bougainville ibin stap long despla miting na emi tok PNG imas sainim despla tok oraet long wonem emi gat boda wantem planti kantri olsem Australia, Indonesia, Solomon Islands na sampla kantri long Micronesia na ol trabalman inap iusim ol despla bodamak mak long bringim hait ol samting blong fait igo long PNG.