Solomon Islands PM i lus long No konfidans vot

Solomon Islands PM i lus long No konfidans vot

Solomon Islands PM i lus long No konfidans vot

Postim 7 November 2017, 14:49 AEDT

Strongfala lobbbying fo trae fo winim sapot fo ranem neks gavman blong Solomon Islands hem gohet strong long Honiara distaem.

Diswan hem bihaen Praem Minista Manasseh Sogavare hem lus long wanfala mosin blong no-konfidens agensim hem long palament yestede.

Aot long olketa 50 memba blong palament 27 memba olketa sapotim mosin an 23 long saet long gavman olketa i agensim.

Memba blong Northeast Guadalcanal an lida blong Independent Group long palament, Dr Derek Sikua nao hem muvum disfala mosin.

Long toktok blong hem, Dr Sikua hem se hem muvum mosin from olketa minista an memba wea ibin lusim gavman an joinim oposisin, olketa i less finis nao long kaen wei Mr Sogavare hem ranem gavman.

Hem se Mr Sogavare hem no save konsaltim olkteta lida blong olketa politikol pati insaet long koalisin gavman taem hem sakim or changim olketa minista, hem herem nomoa toktok blong pipol aotsaet long gavman an hem no folom stret wei fo dil wetem samfala praevet kampani.

Senior lecturer long politics and international affairs long USP, Dr Gordon Nanau hem se hem no sapraes long wei wea olketa long saet long oposisin ibin meintenim naba an winim vout fo aotim praem minista.