Oposisin grup i joinim Sogavare an nominetim Rick Hou fo Solomon PM

Oposisin grup i joinim Sogavare an nominetim Rick Hou fo Solomon PM

Oposisin grup i joinim Sogavare an nominetim Rick Hou fo Solomon PM

Updated 8 November 2017, 15:51 AEDT

Hem luk olsem Manasseh Sogavare hu hem aot finis olsem praem minista long wanfala mosin blong no-konfidens long Mande, bae hem save stap insaet long gavman iet - bat ino olsem praem minista moa.

Diswan hem bihaen sevenfala long olketa memba long oposisin wea ibin vout fo aotim Mr Sogavare olsem praem minista long Mande, olketa i tane raon moa an go joenem saet long caretaker gavman.

Olketa memba ia olketa blong Democratic Alliance Party and Solomon Islands People's First Party - wea hem inkludim leader blong oposisin Jeremiah Manele.

Editor blong Solomon Business Magazine and SBM Online, Robert Iroga hem se niufala grup ia i nominetim finis memba blong Small Malaita, Rick Hou olsem kandideit blong olketa fo praem minista.

Hem se Mr Sogavare nao hem wanfala long olketa wea i nominetim Rick Hou.

Iroga hem se Mr Hou hem talem hem olsem, olketa i lusim oposisin from disagriment long saet long hao olketa searem olketa ministri an leadership.

Nominesen fo niu praem minista hem open finis long moning tude an bae hem klos long Friday naba 10 - an olketa memba blong palamen bae voutim niu praem minista long nekis Wednesday naba 15 long November.

Dr Tarcisius Tara Kabutaulaka, Associate Professor long School of Pacific an Asian Studies University blong Hawai'i hem se olketa toktok fo seksen blong Democratic Alliance Party, hem stat finis bifoa disfala mosin blong no-confidens.

Niufala coalition grup ia hem se hem nao garem 30 long olketa 50 memba blong palament, bat Dr Kabutaulaka hem se hem had fo prediktim politik blong Solomon Islands wea evri samting save change insaet tutri aoa nomoa.