Ol PNG Manus lida ino wanbel long midia itok nogutim Manus

Ol PNG Manus lida ino wanbel long midia itok nogutim Manus

Ol PNG Manus lida ino wanbel long midia itok nogutim Manus

Updated 9 November 2017, 13:53 AEDT

Sampla lida blong Manus provins long Papua New Guinea, itok oli no laikim tumas ol tok nogut em ol midia na ol refugees i  mekim olsem ol pipal blong Manus em oli nogut na tu ples blong ol emi wanpla "Hell Hole".

Oli mekim despla toktok bihaen long ol niuspepal, redio na televisan blong Australia na ol narapla kantri iwok long tok olsem Manus na PNG ino safe long ol asylum seeka na refugees long en.

Long namba 31 dei blong despla mun Australia ibin pasin ditensan senta blong en long Lombrum na lusim 600 ol man istap iet long senta.

Taem Australia ibin pasim despla senta, oli bin stopim tu ol sevis olsem wara, kaikai, marasin na power igo long senta na nau ol despla pipal husat ino laik go long tripla narapla ples klostu long Lorengau taon iwok long bungim heve.

Ol despla pipal iwok long tok olsem oli no laik lusim senta long wonem oli wari nogut ol pipal blong Manus bai kamapim bagarap long ol, tasol chairman blong wanpla NGO grup em oli kolim Pacific islands charity, Gabriel Popat itok emi laik askim olsem sopos ol asylum seeka na refugees i tok Manus emi nogutpla ples, oraet blong wonem na oli bin lusim ol kantri blong ol na nau oli painim ol iet long Manus.

 Ap aste, Supreme court ibin tok nolaik long askim blong lawyer blong ol refugees long gavman imas bringim bek wara, iletrisiti, kaikai na marasin igo long ol pipal long senta, na despla ibin mekim 38 ol asylum seeka na refugees long surik igo long ol haus klostu long Lorengau. Provinsal polis komanda long Manus David Yapu ibin tokim Pacific Beat olsem, emi ting planti moa man bai bihaenim ol despla 38 ol man pastem long weekend.

Despla ol kaen rabis toktok em ol midia blong ol narapla kantri iwok long mekim olsem Manus na PNG ino save long ol asylum seeka na refugees i mekim narapla lida blong Manus, olsem gavana blong Manus bipo, Michael Sapau i tokaut long bikpla wari blong en long mun igo pinis we emi askim strong ol gavman blong Australia na PNG long baem compensation igo long ol pipal blong Manus long  kirapim despla wari blong ol asylum seeka na refugees.