PNG gavman imas wok had long stopim sanguma trabal: Ol lida itok

PNG gavman imas wok had long stopim sanguma trabal: Ol lida itok

PNG gavman imas wok had long stopim sanguma trabal: Ol lida itok

Updated 22 November 2017, 9:15 AEDT

Sampla communiti lida itok gavman imas wok hard nau na kamapim ol strongpla loa blong stopim pasin blong kilim na bagarapim nating ol narapla bihaenim ol tokwin blong sanguma long kantri.

Despla i bihaenim pasin em sampla man ibin mekim long kukim na bodi blong liklik pikinini meri husat igat sikispla krismas long Enga provins.

Despla  emi nambawan taem we wanpla liklik pikinini i kisim taem bihaenim ol tokwin blong sorcery oa sanguma.

Yumi  save harim ol stori long ol yangpla meri na ol mama husat isave bungim heve long han blong ol man em oli save sutim tok long ol despla meri olsem oli save kilim ol narapla long posin, tasol nau despla liklik meri i bungim heve.

Oli bin putim despla pikinini long haus sik, tasol nau emi stap long wanpla seif ples long Highlands iet.

Wanpla lida blong katolik sios long Southern Highlands province husat istap long anti sorcery task fos long Enga,  Bishop Donald Lippert itok emi laik lukim despla heve i opim eye blong gavman na communiti long despla bikpla heve long Highlands rijan.

Narapla lida blong highlands rijan husat isave wok hard tru blong daonim wari blong sorcery violens long simbu provins itok, wanpla samting emi laik lukim i kamap strong em long saed blong loa.

Monica Paulus tu ibin bungim ol heve we oli bin sutim tok long en olsem emi save mekim ol sanguma pasin na nau emi no stap moa long simbu provins..na emi bin autim despla tingting blong en long stat blong despla mun.