PNG LNG papa graon kros

PNG LNG papa graon kros

PNG LNG papa graon kros

Updated 23 November 2017, 15:05 AEDT

Ol papa graon long Hela province long Papua New Guinea itokaut pinis olsem emi stret oli bin pulim kalabusim wanpla waitman blong LNG gas well long Angore long opim eye blong gavman long ol bikpla wari blong ol papa graon.

Lida blong Agu clan long Hydes, John Kalo i tok oli bin kisim despla man long Angore gas well na oli bin lusim em igo free pinis, tasol despla ples i pas iet.

Mr Kalo i tok oli bin bagarapim planti samting long despla plant long wonem oli laikim gavman long bihaenim ol tok promis blong en long givim nau ol royalty moni blong ol.

ExxonMobil we i papa long gas conditional plant long Hides i surikim pinis planti long ol wokman-meri blong en igo long ol narapla hap long lukautim laif oa safety blong ol.

Mr Kalo i tok ol papa graon long Hydes oli laikim gavman long baem samting olsem 43 million kina long ol wok divelopman emi bin tok promis long givim ol sampla yia igo pinis.
 

Stap yet long dispela stori na Police Commander long Hela Province itok emi luksave long frastresen blong ol dispela papa graun, tasol em i tok ol pipol imas noken kisim loa long han blong ol yet.

Superintendent Michael Welly i tok ol papa graun imas bringim ol wari oa dimand blong ol igo thru long ol rait otoriti long dil wantaim, na ino go stret long bagarapim ol propati blong kampani.

Superintendent Welly i tok dispela kain pasin bai no kamap sapos igat gutpela sistim i stap long ol grup we i stap insait long LNG projek long oli ken komiuniket long wanpela narapela.

So em itok em bai gutpela sapos igat ol gavman ofisa long sait long petroleum na energy i stap tu long provinsol capital long Tari.