PNG Chif Jastis i bungim heve long Enga provins

PNG Chif Jastis i bungim heve long Enga provins

PNG Chif Jastis i bungim heve long Enga provins

Updated 10 January 2018, 14:40 AEDT

Provinsal polis komanda long Enga provins long Papua New Guinea itok bai oli no nap stopim ol wok painimaut blong ol inap oli kisim olgeta laen husat ibin laik paitim na kamapim heve long chif jastis Sir Salamo Injia.

PPC George Kakas i mekim despla toktok bihaen long Sir Salamo klostu i kisim bikpla bagarap taem emi bin malolo long ples blong en.

Long mande long despla wik sampla pipal long wanpla ples klostu long vilis blong Sir Salamo ibin bung na stopim kar blong en bihaenim ol askim blong kompensation ino bin kamap gut.

Ol despla laen ibin wok long askim long compensation bihaenim dai blong wanpla man em oli sutim tok long tupla meri blong vilis blong chief jastis long kilim despla man wantem puripuri oa sorcery.

Planti pipal tru long kantri i kirap nogut long despla kaen pasin em oli mekim agensim chief jastis, wantem tu minista blong Justis na Attornery General  Davis Steven itok oli mas givim strongpla mekimsave long ol pipal husat ibin kamapim despla heve long Sir Salamo Injia.

Enga Provinsal Komanda George Kakas itokim Radio Australia olsem ol ofisa blong en igo pinis long ples blong painim ol despla trabalman.