Solomon bajet kat bae spoelem olketa provins an pipol

Solomon bajet kat bae spoelem olketa provins an pipol

Solomon bajet kat bae spoelem olketa provins an pipol

Updated 21 March 2018, 11:23 AEDT

Olketa pragram an plan blong evri provinsol gavman long Solomon Islands bae hem efektem nogut sapos nasinol gavman hem gohet fo katem 50 percent long olketa sevis grant an samting olsem 90 percent blong Capacity Development Grant fo olketa projek.

Premier Anthony Veke blong Guadalcanal Province hem se Cabinet hem apruvum finis olketa kat ia andanit long 2018-2019 bajet bae hem go long palament.

Bat hem se samfala toktok hem kam aot from gavman moa olsem gavman hem bae putum baek sevis grant long levol blong last yia.

Long Guadalcanal, Premier Veke hem se sapos gavman hem gohet wetem olketa kat ia long bajet, bae hem barava spoelem nao evri program an plan blong province.

Hem se hem maet minim, provins hem bae finisim nao olketa samting olsem 100 direct employees blong hem bikos bae nomoa selen fo peim olketa, an wanfala education scholarship program blong olketa Guadalcanal student.

Premier blong Makira-Ulawa Province Province, Stanley Siapu hem askem nasinol gavman fo mas no katem olketa sevis na development grant go long provins blong hem.

Mr Siapu hem se nasinol gavman hem mas tingting gut bikos selen wea hem go long olketa provins hem save benefitim kasem 90% long pipol.

Hem se bae hem no fea tu sapos gavman hem katem olketa sevis an development grant, an semtaem hem kipim plande million dollar wea each wan long olketa memba blong palament i save getem long Constituency Development Fund.