Igat nid long impruvim moa PNG Solomon boda sekiuriti

Igat nid long impruvim moa PNG Solomon boda sekiuriti

Igat nid long impruvim moa PNG Solomon boda sekiuriti

Postim 24 April 2018, 15:59 AEST

Ol polis blong Papua New Guinea na Solomon Islands i wanbel olsem oli gat gupela wokbung i gohet long sait long lukautim boda blong tupela kantri, tasol igat nid long kamapim wanpela agriment long mekim gut moa ol boda wok namel long tupela kantri.

Dispela i toktok we PNG Deputy Police Commissioner na Chief of Bougainville Police, Francis Tokura na Solomon Islands Deputy Comissioner of Police Operations, Gabriel Manelusi ibin tokim Radio Australia.
 
Tupela wantaim i tok, tupela polis force wantaim i save wok gut long dil wantaim ol loa na sekiuriti isiu we i kamap long boda rijin namel long South Bougainville na western hap blong Solomon Islands.
 
Bougainville Police Chief Francis Tokura i tok hau ol ibin dil wantaim wanpela illegal immigrant blong Ukraine tupela wik igo pinis, em i hau tupela polis i save wokbung.
 
Solomon Islands Deputy Comissioner of Police Operations, Gabriel Manelusi i tok wanpela agriment oli wok longen bai mekim tufala polis force iken wokim joint patrol long solwara boda namel long Bougainville na Solomon Islands.
 
Memba blong South Bougaunville long Papua New Guinea palamen, Timothy Masiu ibin tokim Radio Australia tu olsem igat nid long gutpela sistim long kontrolim pipol we igokam long boda blong Bougainville na Solomon Islands.
 
Mr Masiu husat i Deputy Opposisan Lida blong PNG i tok, em i laik long tupela PNG na Solomon Islands imas statim baek gen ol regular boda toktok.