Ol ANZAC seremoni long Rabaul na Bougainville

Ol ANZAC seremoni long Rabaul na Bougainville

Ol ANZAC seremoni long Rabaul na Bougainville

Postim 25 April 2018, 15:53 AEST

Tede ol pipal blong Australia, New Zealand na ol narapla kantri long Pacific rijan i makim ANZAC day we oli tingim ol soljia na ol narapla pipal em oli bin dai long wold war one na world war two.

Papua New Guinea tu ibin makim tede wantem sampla seremoni, olsem long Rabaul long East New Britain provins we oli bin holim tupla sevis oa commemorations, moa long despla stori bihaen, tasol Rabaul, emi bin wanpla ples we ol soljia blong Japan, Australia na Germany ibin fait na planti pipal ibin dai long tupla war wantem.
 
Long wold war one, Australia ibin lusim ol nambawan navy ofisa blong en long ol solwara blong East New Britain, long ship em oli bin kolim long AE1.
 
Despla ship ibin lus long 103 yiar inap long mun december long 2017 taem oli bin painim. Aste Rabaul Historial society ibin go pas long wanpla seremoni long ples we oli gat mak blong narapla ship em ol Australian pipal ibin dai long en long wolrd war, monte video maru.
 
Bougainville ibin wanpla ples tu long New Guinea Islands rijan we ol bikpla fait ibin kamap long en, na tede ol pipal ibin holim wanple seremoni long makim anzac day bihaen long 30 years.
 
Oli bin stop long holim ol anzac seremoni long hap bihaenim ol bikpla trabal long ol 1980's, na despla wold war two monument oa mak ibin bagarap, tasol tripla polis ofisa blong New Zealand husat iwok aninit long community policing project blong New Zealand gavman ibin wok wantem ol lokal pipal long klinim despla ples na tede long moning oli bin holim seremoni long hap.