Mipela Husait
Pearson Vetuna
Executive Producer
Pearson ikam long Rabaul, East New Britain Province. Em stat wantem ABC long PNG long 1967 na bihain joinim NBC taim dispela niupla PNG nesanel brodkasta I kirap long 1973. Em joinim Radio Australia long 1985. Bikpla tingting blong em, em long mekim Radio Australia ikamap bikpla Tok Pisin brodkasta long Pasifik rijen. Em isave produsim Nius na Karent Afeas.
Pius Bonjui
Executive Producer
Pius Bonjui i wok wantem Radio Australia long longpla taim. Em ikam long East Sepik provins. Emi bilip radio imas mekim mo blong eduketim na infomim pipal blong Melanesia long ol problem iwok long givim heve long laif blong ol na wanem rot oli ken bihainim blong bringim gutpla laif ikam insait long wanwan komuniti. Olsem na emi produsim progrem oli kolim, “Laif Long Melanesia”. Em isave produsim tu Nius na Karent Afeas, progrem i lukluk long ol bikpla nius i kamap long rijen.
Kenya Kala
Producer
Kenya ikam long Central Province long wanpela nambis Motu vilis arasait long kapital Port Moresby. Brodkas histori blong em ibin stat taim em wok wantaim National Paliment long Port Moresby olsem wanpla Interpreter/Translator. Emi bilip radio iwanpela kuikpla wei blong kisim nius na lainim samting. Emi lukautim Helt Ripot, wanpela program ikaramapim ol kain kain helt stori na isu blong rijen na ovasis. Em produsim tu Nius na Karent Afeas program.
Paulus Kombo
Producer
Paulus ikam long Tindom vilis long Southern Highlands blong PNG. Oli save tok provins blong em igat bikpla oil, gas na gol. Blong wanem na em ino stap bek long ples? Em tok, bikos long drim blong em long kamap brodkasta. Drim i stat long praimeri skul na nau em wanpela brodkasta. Em produsim Nius na Karent Afeas na Wantok progrem, we em save toktok wantem ol wantok blong PNG, Solomons na Vanuatu husat istap long Australia, blong larim ol i stori long laif long Australia.
John Papik
Producer
John ikam long Aitape long West Sepik Province blong PNG, wanpla eria em taraipla taidel wev ibin bagarapim na kilim planti handret pipsl long 17 Julai 1998. John i laikim redio bikos emi laik bringim infomesin long pipal husat ino save kisim niuspepa. Em save produsim Nius na Karent Afeas na spesal blong em, em Sports, progrem isave lukluk long hau ol kain pipal i helpim komuniti long enjoim laif na promotim gutpla laif stail namel long ol man, meri na pikinini.
Peter Jonah
Producer
Peter iwok wantem Tok Pisin Sevis blong Radio Australia stat long 1979. Em ikam long tupla vilis long Rabaul em volcano i bin bagarapim olketa long 1994 irapsen. Long RA Peter produsim Nius na Karent Afeas na progrem blong ol yut, Yut Foram, we isave larim ol yangpla i toktok long ol kain kain heve oli bungim.
Warium Benson
Producer
Warium ikam long Rabaul, East New Britain Province. Emi joinim ABC long Papua New Guinea long 1960s na bihain joinim Radio Australia long 1974. Emi laik lukim Radio Australia Tok Pisin Service igohet long bikpla wok nau i mekim blong bringim edukesin infomesin blong pipal long ol Melanesian kantri. Emi save produsim Nius na Karent Afeas, na Fokas progrem em isave painim aut mo long ol sosal, politikel na ikonomik problem i afektim laif blong pipal.
Caroline Tiriman
Producer
Caroline ikam long East New Britain Province. Wok blong em long redio i larim emi wok pinis long ABC, NBC na Radio Australia. Caroline igat bikpla wari long envairomen na em i bilip yumi mas lukautim gut ples bai ol pikinini iken gat gutpla laif bihain. Em olsem na emi produsim progrem mipla kolim long “Lukautim Ples” em isave lukluk long ol kain kain heve i kamap long ples – bus, graun, wara na solwara. Em isave produsim tu Nius na Karent Afeas.
