Russia salim nevi sip long stopim ol 'pirate'
Updated
Nevi blong Russia i salim pinis wanpela wo sip igo long solowara arasait long Somalia bihainim ol pirate ibin reidim wanpela sip blong Ukraine.
Niusman Scot Bevan i ripot namel long ol kru ol i kisim long sip, 21 blong ol, i kam long Russia.
Long Fonde, ol Somali pairet ibin banisim sip na kalap antap longen taim em i stap insait long hap international wota mak arasait long kos blong Kenya.
Ripot blong Interfax news agency i tok dispela sip blong Ukraine ibin karim ol military hardware wantaim tu samting olsem 30 tank.
Dispela 'hijack' i wanpela long paltni pirate attack i kamap klostu long Somalia, kantri em igat planti heve na bekim blongen, Russian Navy i salim pinis wanpela patrol sip long Baltic Fleet blongen insait long edia.
Wanpela nevi tok man i tok Russia nau bai igo pas long paitim ol lain stil man oa pirate long solowara.
Em ibin tok ol bai salim ol sevi sip igo long ol eria we ol pirate i save kamapim ol trabol long lukautim ol sitisen blong Russia husait i wok antap long ol sip.
Nau iet, ol gun man blong Somalia ibin kisim narapela chemical tanker blong Greece wantaim 19 kru insait long Gulf of Aden.
Dispela hap i save lukim planti ol 'pirate' wok i kamap longen oltaim.
International Maritime Bureau blong Piracy Reporting Centre insait long Kuala Lumpur i tok ol ibin hijack-im tanker long Fraide taim em i wok long ron igo long Middle East lusim Europe.
