PNG:polis i kilim tripela man wantaim gan.
Updated
Polis long Papua New Guinea ibin sutim na kilim dai tripela man wantaim gan taim oli traim long stilim Bank blong South Pacific long West New Britain provins dispela wik.
Firmin Nanol ibin ripot,Polis long Papua New Guinea ibin tok wanpela gang igat sikispela pipol long en wantaim gan ibin holim pasim ol wokman na meri long Bank blong South Pacific long West New Britain provins.
Polis ibin tok tripela long ol man ibin holim famili blong manager blong han blong bank olsem hostage long wikend na ino bin larim ol fri inap long aste.
Arapela tripela ibin kisim meri manager igo long bank na fosim em long opim safe blong bank.
Polis long West New Britain ibin tok oli bin bagarapim plan blong dispela stil pasin,taim famili ibin nap long toksave long polis taim oli salim text message long phone olsem ol stil man ibin holim ol hostage.
Thomas Reu ibin tok tripela man ibin igo aut lusim bank wantaim 200 000 America dolla taim polis ibin sutim ol.
Polis i bin kisim bek olgeta dispela moni na bringim bek igo long Bank blong South Pacific.
NA Bank ino bin laik toktok long dispela stil pasin.
