PNG: Komuniti na polis i belhat long dai blong yangpla meri
Updated
Na stap iet long Papua New Guinea,we wei em sampla lain i kilim wanpla yangpla meri long hailens rijen, i mekim pipal long komuniti na polis i shock - oa i kirap nogut na belhat tru.
PNG niusman Steve Marshall i ripot olsem, taim ol setelmen pipal igo lukluk gut long wanpla paia oli wokim long diwai na ol taia blong kar klostu long rabis damp, oli painim bodi blong displa yangpla meri insait long paia.
Wanpla lokal niuspepa i tok, oli pasim tupla han blong em, pasim maus blong em, na bihain laitim paia long em aste moning.
Niuspepa i tok, faifpla man i bin wokim displa kriminal pasin.
Bos blong polis long Hailens i tok, kain murder - oa pasin blong kilim man olsem, em i wanpla barbaric pasin - oa i wanpla pasin blong ol man ino save long loa na gutpla pasin.
Em i askim olgeta pipal long halvim polis i painim ol man i kilim displa yangpla meri.
Lokal pipal i ting, ating oli kilim displa yangpla meri bikos oli ting i mas save wokim sorcery oa puripuri na givim HIV AIDS long ol man.
