Pacific: MSG bai miting long Vila
Updated
Ol lida bilong Melanesian Spearhead Group - em oli save kolim tu long M-S-G - bai holim wanpela spesal miting long Vanuatu long wik bihain.
Pacnews i kisim toksave pinis ikam long fopela lida bilong ol MSG kantri, wantaim tu Fiji interim praim minista Frank Bainimarama, olsem dispela miting bai kamap.
I tru nogat wanpela long ol i bin laik toktok moa long ajenda bilong miting, Siaman bilong M-S-G, Edward Natapei, husat i Praim Minista bilong Vanuatu - i bin tok long las wik olsem dispela grup i laikim tru long bung na toktok long saspensen bilong Fiji long Pacific Islands Forum, pastaim long Forum lidas miting long mun bihain long Cairns, Australia.
Pacnews i save olsem, spesal lida retreat bilong MSG bai kamap long kapital Port Vila long Julai 10.
