Thailand: Gavman ino wanbel wantem Cambodia
Updated
Thailand itok olsem pasin em Cambodia i mekim blong makim Praim Minista bifo blong Thailand Thaksin Shinawatra olsem economic adviser inap kamapim ol wokbung namel long despla tupla kantri igo bagarap olgeta.
Robert Carmichael i ripot ikam long Phnom Penh, Cambodia ibin givim Mr Thaksin Shinawatra tupla wok olgeta na despla bai hatim bel stret blong Thailand.
Thaksin, husat i wanpla fren blong Praim Minista blong Cambodia Mr Hun Sen bai kamap olsem ikonomik advaisa blong Cambodian gavman na tu personal advaisa blong Mr hun Sen.
Cambodia i mekim despla tingting bihaenim ol toktok kros wantem Thailand.
Long mun igo pinis Mr Hun Sen ibin tok olsem em bai oraet sopos Mr Thaksin i laik go mekim lukluk raon igo long Cambodia bihaenim laik blong en iet.
Despla ibin mekim Thailand long tokaut olsem sopos Mr Thaksin i tok oraet long go long Cambodia, Thailand bai askim Cambodia long salim emi go bek long Thailand.
Despla long wonem, Thaksin ino bin pinisim tupla yia kalabus em wanpla kot long Thailand ibin givim em.
Phnom Penh ibin bekim despla toktok na tok olsem bai emi no nap stret long salim Mr Thaksin igo long bek long Thailand, long wonem emi ting na bilip olsem ol sas em Thailand ibin sasim Mr Thaksin long en bihaen long oli bin rausim em long wanpla ku long mun Septemba 2006, ibin bihaenim ol kaenkaen heve long ol wok polikik.
