Argentina: Ol bikpla protes na strike i bagarapim Buenos Aires
Updated
Long Argentina, ol protes na ol stopwok i bagarapim na stopim olgeta wok insaet long biktaon, Buenos Aires .
Richard Reynolds i ripot ikam long Buenos Aires olsem sampla long ol despla pipal i sanap halvim gavman, na sampla long ol ken i no laikim gavman.
Wanpla bikpla na strongpla pasin em oli wok long bihaenim nau long Argentina em long corte, we ol protestas isave burum igo long ol bikrot oa ol highway na blokim na pasim ol kar na ol pipal long usim ol despla rot.
Bikpla Highway, emi gat 16-lane long en em oli ron namel long central Buenos Aires ibin pas olgeta inap long tupla dei, na despla ibin kamapim bikpla heve tru long ol rot.
Narapla samting ken, em long subway system, emi save karim 1 million pasindia long wanwan dei ibin pas inap klostu long tupla dei, na despla ibin kamapim bikpla heve ken.
Ol union husat isave halvim gavman ibin pasim wok long tupla fektori em oli save kamapim ol nuspepa em oli no save laikim gavman.
Ol polis long Buenos Aires ino save mekim wanpla samting long stopim ol despla kaen protes.
