Korea: North Korea bot i bagarap long gan blong South
Updated
Wanpla North Korea patrol bot i bin bagarap taim em i pait wantem wanpla South Korea nevi sip long Yellow Sea.
South Korea i sutim tok long North long burukim loa na kurungutim boda blong en.
North Asia niusman Mark Willacy i ripot olsem, Yonhap nius ejensi blong Seoul i wok long ripot olsem displa North Korea patrol bot i bin abrusim solwara boda blong en, na displa i mekim South Korea nevi sip long sut long gan blong tok lukaut long en.
Tasol displa North Korea bot i gohet yet na bihain tupla sipo i sut long wanpla narapla.
Yonhap nius i tok nogat man i dai oa kisim bagarap long sip blong South Korea, tasol ripot i tok bot blong North Korea i bin bagarap taim nevi sip i sutim em long gan.
Bihain em i surik igo bek long solwara blong North Korea.
Mark Willacy i tok, insait long displa tenpla yia igo pinis, tupla arapla pait tu i bin kamap long displa eria long Yellow Sea we sampla pipal i bin dai.
