Poly: Oli arestim na sasim Floss long korapsen
Updated
Long French Polynesia, ol otoriti i holim kalabus olpla president Gaston Flosse taim oli mekim ol investigesin long korapsen.
Toktok i sut long Mr Flosse na ol narapla memba blong politikal pati blong em long tok yes long ol gris-moni taim oli ronim gavman.
Alex du Prel, edita blong Tahiti Pacifique magazine, i tokim Radio Australia olsem, oli arestim Mr Flosse sotpla taim igo pinis bihain long miting blong em wantem wanpla jads.
Oli sasim em long korapsen, na long bagarapim ol pepa.
Na State Attorney i tok nem blong em i stap tu long narapla 30 investigesin em oli gohet yet.
Long wik i pinis oli bin rausim samting oli kolim, parliamentary immunity em i bin banisim em long investigesin, na nau ol investigeta i ken gohet na askim em ol kain kwesten long ol tokwin blong korapsen.
Em i stap wanpla French seneta yet na wanpla kaunsela long French Polynesia lokal asembli.
