NEWCAL: Nickel kampani SLN i plan long pinisim moa wokman
Updated
Wanpela long ol bikpela kampani long New Caledonia, save employim planti wokman, nickel miner SLN, i tok em i tru olsem em bai daunim wokfos blong em long 12-pesen insait long tripela yiar ikam.
Dispela kampani i wok long painim i hat long dil wantaim pudaon blong commodity prices na long stat blong dispela yiar, em i bin tokaut olsem em i stat long lusim moni.
Nau em i bin tokaut long ol tingting long daunim wokfos blong em long klostu 300.
Ol narapela tingting blong katim kos, em long daunim production na saveim energy tu.
Het blong SLN, Pierre Alla i bin tokim Radio Australia olsem, ol trade unions husat ino laikim dispela tingting, i mas save olsem, bai oli noken fosim pipal long kisim redundancies oa givim ofa long ol long peim ol aut.
