Indo:Foren Minista kirapim tim blong glasim oil kapsait
Updated
Foran Minista blong Indonesia i kirapim wanpla tim long skelim gut hamas mani kantri i bin lusim bihainim wanpla bagarap long Western Australia we taraipla oil i bin kapsait ikam long ples blong kisim oil long solwara.
Stat long mun Augus displa yia na igo inap long tenpla wik olketa, taraipla oil -- samting olsem 500-tausen lita -- i bin wok long kapsait i kam aut long West Atlas oil rig long Timor Sea.
Ino long taim igo pinis, Australian embesi long Jakarta ino bin wanbel long wanpla toktok olsem, kapsait blong oil ia i bin bagarapim solwara blong Indoneasia.
Tasol Antara nius ejensi blong Indonesia i ripot olsem, Indonesia foran minista Marty Natalegawa i kirapim pinis wanpla tim blong galasim na skelim gut wanem kain heve displa bagarap i bin kamapim long Indonesia, na sapos oli ken askim long kompensesin.
Siaman blong lain oli kolim - Care West Timor Foundation, Ferdi Tanoni, i bin tokim Antara nius olsem, ol pipal i bungim heve long displa bagarap, moa yet ol fishermen long rijen, i amamas long displa wok-painim-aut bai oli mekim.
Em i tok, pollution oa posin na bagarap i kamap long displa oil, i samting blong tripla kantri long wari long en bikos East Timor tu i bin stap long ol toktok wantem Indonesia na Australia.
