China: Oli painim ken posin long milk
Updated
Ol gavman ofisal long China i wok long pasim ol kampani i save wokim milk na ol narapla samting oli wokim long milk.
Oli wokim displa bihain long oli painim sampla niupla posin ken long pauda milk.
ABC niusman long China, Stephen McDonell i ripot olsem long 2008 siispla pikinini i bin dai na planti handret tausen i bin go long hospital bihain long ol Chinese kampani i save wokim milk na ol narapla samting, i bin miksim kain posin kemikal oli kolim Melamine long pauda milk.
Oli wokim olsem blong apim mak blong protein long milk, tasol displa pasin blong ol i bin kamapim bikpla bagarap tru long Chinese dairy industry - bisnis long milk na ol narapla samting ikam long milk.
Nau ol inspekta long China i painim sampla niupla pauda milk em i gat ken Melamine long en.
Tupla kampani - Tiantian na Panda long Ningxia, nau oli pasim pinis.
Ol lokal nius ripot i tok, klostu 100 tonnes posin milk ating i mas stap long ol stoa nambaut.
Nogat ripot i kam sapos sampla i dai pinis oa oli sik long displa niupla raun blong posin milk.
