PNG: Polis i arestim ken William Kapris
Updated
Polis long Papua New Guinea i arestim pinis ken William Kapris, nambawan kriminal long kantri husat i bin ronawe wantem ol narapla long haus kalabus na i bin wok long hait nambaut.
PNG niusman Liam Fox i ripot olsem, polis i bin arestim Kapris long wanpla lodge long Port Moresby long Sarere apinun bihain long sampla lain i bin toksave long ol.
Ripot long National niuspepa i tok Kapris i bin gat pistol tasol taim polis i kam em ino mekim wanpla samting bikos oli bin banisim displa lodge.
Kapris na narapla 11 kalabus i bin wok long hait nambaut inap klostu wanpla mun nau, bihain long oli bin ronawe long wanpla maximum-security jail arasait long Port Moresby.
Kapris nau i stap bek long displa haus kalabus.
Polis i bilip em tasol i bin go pas long kriminal pasin we oli bin robim bikpla mani long ol bank.
Oli ting em i mas halvim tu long kilim idai wanpla polisman, haijekim wanpla balus na stilim ol samting long wanpla metal fektri.
