Solo: TRC i harim planti nogutpla na gutpla stori
Updated
Publik hearing blong Solomon Islands truth na reconciliation komisin long Honiara i harim planti moa stori long ol bikpla heve, ol bikpla wari na tu stori blong bel isi.
Solomon Islands iwok long traem long kamapim gutpla sidaon na bel isi namel long ol pipal blong kantri bihaenim faifpla yia we ol bikpla trabal na fait ibin kamap long kantri.
ABC niusman long PNG Liam Fox i ripot ikam long Honiara olsem komisin iwok long harim ol stori blong ol pipal husat ibin kisim na bungim heve long taem kantri ibin kisim taem bihaenim ethnic tensan emi bin kamap long kantri namel long 1997 na 2003.
Moses Garu blong Guadalcanal ibin tok olsem ol trabalman blong Malaitan Eagle Force ibin katim em wantem ol naif long May 2000 tasol emi wanbel wantem ol pinis.
Rose Proctor ibin traem hard tru long noken krai, taem emi bin tokim komisin olsem, man blong en, brata blong en na kandre meri blong en ibin lus nating long bot blong ol long 2002.
Emi bin askim ol pipal husat ibin kilim femili blong en long tokim em na soim ples we oli bin putim bodi blong ol.
Komisin bai mekim wankaen bung oa hearing long ol narapla hap blong kantri, blong traem long stretim na pinisim ol bikpla belheve na kros emi wok long stap iet namel long ol pipal bihaenim despla bikpla trabal em kantri ibin bungim.
Emi laik harim stori tu blong ol pipal na laen husat ibin kamapim ol trabal long ol narapla.
