Thai: Ol Shinawatra sapota bai bung long bankok

Updated March 13, 2010 21:00:22

Long Thailand, ol lain i save protes agensim gavman i wok long bung wantem insait long kapital Bangkok, blong mekim samting oli kolim - a "million-man march".

Ol displa protesta -- husat i sapotim olpla praim minista Thaksin Shinawatra, husat i bin ronawe na stap long narapla kantri -- i tok ol bai stap long kapital inap long sevenpla de na tingting blong ol em long fosim man husat i praim minista nau, Abhisit Vejjajiva, long makim taim blong eleksen.

Ol otoriti i salim samting olsem 40,000 solja na polis igo wok raun long Bangkok long Fraide, taim sampla tausen pipal i werim ol retpla-siot -- ol sapota blong Thaksin Shinawatra -- i bung blong "warm-up" -- oli tok, pastaim long bikpla bung tru long Sande.