Japan: Wanpla New Zealand man bai kisim sas
Updated
Long japan, oli bringim pinis wanpla man blong New Zealand igo long kot bihaen emi bin go insaet nating long wanpla whaling sip blong Japan long Southern Ocean. Despla man ino save laikim tru pasin em Japan isave mekim blong painim na kilim ol whales oa emi anti-whaling man.
Oli bin kisim na kalabusim Peter Bethune bihaen long emi bin laik kalabusim kepten blong despla whaling ship.
Yumiko Asada i ripot ikam long Tokyo, olsem ol nius ripot iwok long ripot olsem oli bin bringim Peter Bethune igo long Tokyo District Public Prosecutor's ofis tede long moning.
Oli sasim em long brukim loa na go insaet nating long sip, na ating oli nap kalabusim em inap long tripla yia oa emi nap baem kot long wan tausan tu handrat dola.
Mr. Bethune ibin bung na toktok wantem ol loyas long Fraide, bihaen tasol long emi bin kamap long Tokyo long whaling ship, Shonanmaru 2.
Emi bin go insaet long despla sip long mun igo pinis blong soim tingting nolaik blong en bihaen long bot blong en, Ady Gil ibin kapsaet na go insaet long solwara bihaen long despla tupla bot ibin bam long Southern Ocean.
Despla emi nambawan taem stret em ol otoriti blong Japan i pulim kalabusim wanpla memba blong oa bos kru blong Sea Shepherd Society.
Long despla tupla dei igo pinis Ol Coast Guard blong Japan iwok long toktok na askim Mr. Bethune long hau tru na emi bin kalap na igo insaet nating long Shonanmaru 2.
Ol Anti-Whaling Activists nau iwok long askim strong gavman blong Australia long traem na mekim wanpla samting blong halvim Bethune.
Gavman blong New Zealand itok pinis olsem gavman ofis blong en long Tokyo bai givim sampla halvim.
