Philippines: Human Rights komisin bai mekim wok painimaut
Updated
Philippines Commission blong Human Rights bai mekim wok painimaut igo insaet long wanpla fait we oli bin usim ol gan long wikend igo pinis long south blong Sulu province we oli tok sevenpla pipal ibin dai na tripla narapla ibin kisim bagarap.
Philippines military itok olsem oli bin kilim na kamapim bagarap long ol lida blong laen trabal em oli save kolim ol iet long Abu Sayyaf .
Tasol ol lokal polis itok olsem ol despla pipal em oli bin kilim ol em ol pipal nating oa ol sivilian.
Shirley Escalante i ripot ikam long Manila olsem police chief long Sulu provins Joseph Ramac itok oli save olsem ol pipal husat ibin dai na kisim bagarap em oli no memba blong Abu Sayyaf, tasol oli pipal blong ples husat ibin asua na stap taem ol polis ibin wok long fait wantem ol Abu Saiaf.
Tupla long despla sevenpla pipal husat ibin dai em tupla meri.
Na long tripla husat ibin kisim bagarap em tupla meri tu.
Tasol ol militari itok olsem ol soljia ibin go mekim wanpla wok blong painim ol trabalman bihaen long oli bin kisim ripot olsem, wanpla laen husat isave wokbung wantem Jemaah Islamiyah ibin stap na wok long Laminusa island long Sulu. Oli tok despla laen trabalman isave wok aninit long lida blong Jemaah Islamiyah husat iwanpla man blong Malaysia em oli kolim long Zulkifli Bin Hir oa narapla nem blong en Marwan.
Ol lokal polis itok olsem ol pipal blong ples i ronowei lusim ailan blong ol pinis bihaenim despla fait long wonem oli poret nogut despla fait bai go bikpla moa iet.
